من أسبوعين, قررت أنا و أصحابي من الشغل اننا نروح الحسين . كانت أول مرة أروح هناك مع اني مصرية و طول عمري عايشة في مصر.
كنت متحمسة قوي أروح الخان و أشوف قهوة الفيشاوي و زينب خاتون.و المالكي. كنت ببقى متضايقة قوي لما بلاقي اصحابي قاعدين بيتكلموا عل المحلات اللي هناك و يمشوا ازاي يلاقوا شارع المعز . بس كان بابايا دايما بيعارض انني اروح مع صحابي البنات لوحدنا عشان الناس متضايقناش. ف أخيرا الدنيا زبطت اننا نبقى جروب كبير و فيه ولاد فنبقى ضامنين ان محدش حيغلس.
و احنا خلاص بنتفق عل أماكن اللي حنروحها هناك و المواعيد لقيت واحدمن اللي جايين معانا بيقول"نصيحة لكل بنت مش محجبة يا ريت تلبسي واسع على قد ما تقدري" حسيتوا بيهرج. ده مكان سياحي يعني أكيد الناس اللي هناك مش بيركزوا فمين لابس ايه والمعاملة حتبقي كويسة....بس قلت احتياطي البس أوسع حاجة عندي و خلاص.أول ما وصلنا هناك كنت ماشية أنا و واحدة صاحبتي و واحد كمان كنا سابقين باقي الناس بحاجة بسيطة......لقيت الناس فمجموعة القهاوي و المطاعم اللي في الاول قاعدين يجروا ورانا و تعالوا و نفعونا و احنا بنقولهم ان شاء الله و احنا راجعين و فجأة لقيت واحد من اللي واقفين عند المطعم قاعد يقرا اللي مكتوب علي التي-شيرت اللي لابساه بصوت عالي لدرجة ان اللي كانوا ماشيين ورانا اتحركوا أسرع عشان يشوفوا الكلام ده كان علي مين و الراجل اللي كان مصر اننا نروح ناكل عنده بيقول اهو مرسي كسب و حيخلصنا من أشكالكوا. طبعا أنا عملت فيها مش واخدة بالي و كملت على قدام مع الباقي عشان نوصل نجيب محفوظ..............و دخلنا الخان...كان في الأول شايفاه عادي بس الناس برده كلهم بيقولوا تعالى شوف اللي عندي و احنا مصريين زي بعض....دخلنا نجيب محفوظ حسيت أخيرا بالهدوء و الراحة و المعاملة النظيفة اللي كنت متوقعاها في الحسين علي بعضه. بعد ما خلصنا أكل قمت أنا و باقي البنات عشان نتمشى في الخان... و نشتري فضة.....و كانت الصدمة التانية في المكان البياعين قربوا يشدونا من ايدينا جوه المحلات و تسمعهم و هما بيتكلموا علي اللبس و ييجوا عايزنه نشتري منهم......طب ازاي و انت مخوفني و قرفتني من المكان؟؟
بعد لما رجعنا كان فيه سخافة بسيطة بس من وكالة الغوري لزينب خاتون لغاية ما طلعنا من الحسين كانت الدنيا عادية.
اللي أحب أعرفوا هي الدنيا هناك كده من الاول ولا الناس اتغيرت ولا ايه اللي حصل؟؟؟
